تجربتي الخاصة في السنة الثانية في الطب , نصائح مهمة , ومصادر دراسة.

مقدمة : 

أهلاً بكم يا أطباء المستقبل , هنيئًا لكم إنهاء السنة الأولى أخواني وأخواتي , أسأل الله تعالى أن ينفع بكم , ويجعلكم سببًا في إرتقاء أمتنا إلى أعلى المستويات.

السنة الثانية لا تختلف كثيرًا عن السنة الأولى , نفس نظام الدراسة , طريقة تقسيم الدرجات , نفس المواد ومع تجربتكم وخبرتكم في سنتكم الأولى , ستصبح التجربة اقل صعوبة وثرية جدًا. 

راح تدرسون 4 بلوكات , 2 في كل ترم. 

الترم الأول راح تدرسون :

1.  الجهاز العصبي والنفسي ( Neuropsychatriy )
2. الجهاز الهضمي والتغذية ( Gastrointestinal and nutrition block ) 
3. المهنة الطبية (Medical professionlism ) 
4. الفقة الطبي 

الترم الثاني راح تدرسون : 

1.  جهاز الغدد الصماء ( Endocrine )
2. الجهاز التناسلي ( Reproduction block ) 
3. سلامة المريض ( Patient safety ) 
4. أخلاقيات المهنة 

راح أتكلم عن اهم بلوكين اللي هم النيورو والجي اب بتاخذونها بالترم الاول. 

Neuropsychiatry block :

• 92 محاضرة
• عدد ساعات البلوك في المعدل 12
• عدد اسابيع البلوك 9 اسابيع
• بامكانكم مشاهدة جدولنا هنا  , و جدول البنات هنا 

هذا البلوك هو أكثر بلوك عليه عدد ساعات , تجربة البلوك هذا كانت ثرية جدا وكمية المعلومات اللي تستوعبها بعده كبيره , لا عجب ان اكثر الطلاب يشدون حيلهم لانه اول بلوك في السنة وكل الطلاب تقريبًا ارتاحوا واعادوا شحن طاقتهم. 

Anatomy 

• الاناتومي كان 19 محاضرة , والمحاضرات كانت دسمة شوي لكن مو صعبة ابدًا , لان الدكاترة حقين الاناتومي كانوا مره كويسين. 
• الأناتومي زي ما انتوا عارفين يغلب عليه الحفظ ف إيش صرت اسوي؟ حملت تطبيق ع الايباد للرسم وحاولت أرسم , مو رسام انا ابدًا لكن كنت أحاول ولا اخفيكم ان أثرها كان جدًا مفيد + وكنت أسوي جداول وملخصات , باختصار مذاكره الاناتومي كذا بس تقعد تقرا من السلايدز ما نفعت معاي كان لازم أكتب وعاد كل شخص وطريقته بالمذاكره.

أمثلة على الرسمات اللي كنت أسويها التطبيق اسمه Sketch : 

• اغلب المحاضرات في هذا البلوك ذاكرتها من التيم , لا عجب في أن تيم الاناتومي 436 فاز بأفضل تيم شغلهم كان جبار جدًا  -ولو اني كنت اشوف تيم البايو يستاهل بعد-
• أستعملت Neuroanatomy by corssman , الكتاب هذا كان رائع جدًا وافادني كثير أيضا كابلان اناتومي حلو مره.
• بالساك اذكر جانا سؤال اناتومي بجزئية بين الاسطر من محاضره كانت من المد , عشان كذا ذاكروا كويس. 
• المحاضرة الأولى تكرار من محاضرة خذيناها في الفاونديشن. 
• الاوسبي كان الاناتومي جاتنا اسئلة مو موجودة في الملف واسئلة من النظريه ف نصيحة ذاكروه كويس 

Physiology 

• الفيزيولوجي البلوك هذا كان 29 محاضره , درسنا فيه الدكتور صلاح والدكتور شاهد حبيب والدكتور سلطان ميو. الدكتور صلاح هو الوحيد اللي كان بالمستوى وكان رائع بهذا البلوك الباقي عندي تحفظ اتجاههم , الدكتور فاتن شرحها رائع. 
• المادة ما اخفيكم كانت ثقيلة وبداية البلوك كنت ضايع ما أعرف من فين اذاكر, السلايدز ما كانت واضحه وماني قادر استوعبها لين وجدت ضالتي , نعم ضالتي في الاسطورة الدكتور نجيب , تعجز الكلمات عن وصف هذا الاسطورة في شرح الفيويولوجي كان شيء لا يصدق يفهمك ويدخل المعلومه في راسك بطريقة سلسلة وما تنساها , صراحة لو ما بتطلع من المدونة هذي الا بنصيحة وحدة هي د.نجيب في الفيزيولوجي في بلوك النيورو تكفيك. طبعًا كنت اسرع المقاطع واشوفها بسرعه 1,5 وملاحظة ما كنت اشوف مقاطع لكل المحاضرات. مشكلة د.نجيب ان المقاطع طويلة بعضها بشكل كبير , ملاحظة أخرى كنت أكتب مع د.نجيب وانا اشوف مقاطعه بحيث بعدين لمن اراجع المحاضره اصير افتح النوت بس وامر عليها بدون م افتح المقاطع مره ثانية. 

Pharmacology

• الفارماكولوجي ما اخفيكم انها كانت مسببه رعب كبير للطلاب في بلوك النيورو , 14 محاضره , تكمن صعوبتها في أن أغلب اسماء الادوية جديدة عليك ف يحتاج لها حفظ ومجهود مضاعف.
•   كيف كانت طريقتي في الفارما ؟ أولاً الحضور وفهم المحاضره كان مهم وملاحظة الدكاترة حقين الفارما كلهم جبارين سواء دكاترة البنات أو الأولاد ( عن نفسي اشوف الدكتور أسامة هذا البلوك كان اسطورة مع ان الكثير يختلف معاي)  , ف اول شيء تحضر المحاضره وتفهمها + حاول م تأخر مذاكره المحاضرة يعني الفارما هذا لازم اول بأول + اعملوا جداول وملخصات هذي الاشياء جدًا افادتني , ف كنت اسوي جداول في الونتابيلتي لكل المحاضرات وعليكم بالتكرار. 
• كتاب pharmacology recall anand ramachandran كان رائع جدًا تلقونه بجرير انا فادني الكتاب هذا 
• أيضًا فيه مقاطع حقت Sketchy Medical هذول يجيبلوك سكيتش وقصة كذا ويربطونها بالادوية , فكرتهم حلوه بأمكانكم تشوفونها باليوتيوب 
• تيم 435 جبببببببار 

Pathology 

• الباث في البلوك هذا بسيط ومو صعب وراح يدرسكم اياه الاسطوره الخالدي هذا افضل دكتور باث قد مر علينا وبطل مره مره 
• السلايدات تكفي واصلاً سلايدات الدكتور نسخ لصق من روبنز, بس اللي يبغى الأستزادة يقدر يفتح روبنز 
• باثوما بعد مروا عليه مو خسرانين شيء بالنسبة لي باثوما اساسي بكل بلوك لازم أمر عليه 
• ولا تنسون Osmosis بعد 

باقي المواد 

• عندكم الطب النفسي Psychiatry هذي المادة جديدة واتوقع اول مره تدروسها اسألتها تكرر كثير من اللي خبري خبركم :) وأيضا بعض الاسئلة تكون من برا السلايدز , فيديوهات Osmosis رائعه 
• المايكرو 5 محاضرات وبسيطة م تحتاج 
• والبايو بعد كان حلو وممتع بالنسبة لي كتاب ليبنكوت البايو اساسي في المذاكره ف دايم احب افتحه لمن اذاكر البايو في اغلب البلوكات مو هذا بس 

Gastrointestinal nutrition block

• 93 محاضرة
• عدد ساعات البلوك في المعدل 3
• عدد اسابيع البلوك 9 اسابيع
• جدولنا هنا وجدول البنات هنا 

الجي أي وم ادراك م الجي أي , اكثر بلوك يتعيشون فيه ضغط محاضرات , اذكر الميد كان أول 4 أسابيع يعني كان عندك الخميس والجمعة والسبت قبل الاختبار تراجع حول 50 محاضره :(  , البلوك هذا يحتاج إلتزام وبلوك تقدر تجيب فيه A+ بشرط انك تلتتزم من اول يوم الى أخر يوم , الساك حرفيًا كان نصه مايكرو , ف عشان كذا ركزوا فيه كويس :)
الدكتور منصور الجابري قالنا أنهم احتمال يزيدون الوقت في البلوك هذا بس السنه الجاية اللي هم انتوا بس ما ادري اذا بيطبقونها او لا .  

 Physiology 

• الفيزيولوجي في هذا البلوك كان عبارة عن 11 محاضره عددها قليل بس المحاضرات دسمة شوي , بيدرسكم الدكتور الزغيبي , دكتور أقل م يقال عنه رائع , شرحه ممتع جدا وشخص متمكن من المحتوى العلمي اللي يقدمه. 
• سلايدات الدكتور الزغيبي نسخ لصق من غايتن ويجيب بعض الداقيرامز من ليندا
• المحاضرات زي م قلتكم دسمة بس مو صعبة , وذاكروها أول بأول , ليندا كان ممتاز في البلوك هذا جداوله حلوة وتلخصلكم الأمور.
• مراجعة الزغيبي اللي يسويها لكم مهمة مهمة مهمة مهمة 
• فيه محاضرتين بيعطيكم أياها الدكتور شاهد حبيب , عن الCougulation و platelets سهلة مره وتتكرر عليكم في الهيماتولوجي ( بشرحلكم اياه تحت ).

Microbiology 

• البلوك هذا درسنا البروف الصميلي والدكتور خليفة بن خميس ( محاضرات البكتيريا طبعًا) كلهم اسطوريين مرررره وخصوصا الدكتور خليفة , كلامهم هو الاختبار بأختصار ركزوا ع اي شيء يقولونه.
• الساك نصه جانا مايكرو ف عشان كذا ذاكروه كويس ومو صعب ابدًا 
• فيه محاضرات الHepatitis مهم تفهموا ال serological profile وتربطونه بمحاضرة العملي 
• بالنسبة لمحاضرات ال parasites م بقول الا الله يسعد الدكتورة منى , شرحها رائع لابعد درجة + في النهاية التيم يرسلنا ملخص يمكن فيه 5 سلايدات الاشياء المهمة ولا اذكر طلع منها ابدًا.
• تيم 435 جبار 

Pathology 

• الباث البلوك هذا برضوا سهل م فيه تعقيد درسنا الدكتورأحمد الحميدي ( اللي جاكم في الكارديو ) , كان يختصرلنا محاضرتين بمحاضرة , واذكر بيوم واحد في ساعه ونص خذينا 4 محاضرات وحلينا أسئلة عليها  :)) , برضوا درسنا الدكتور عبدالملك الشيخ ( ما ادري اذا تعرفونه أو لا ) , بس انه كويس 
• مرجع المذاكرة كان التيم 
• في الأختبار جانا كم سؤال بالباث مو موجودة لا بالسلايدز ولا بروبنز ولا من أي مكان :(( 

Hematology

• هذي مادة جديدة عليكم , أول مرة بتدرسونها فيها 12 محاضرة. 
• درسونا 3 دكاترة , د.منصور الجابري و د. أسامة خوجة و د.المشهداني 
• الدكتور منصور الجابري رائع ومن أفضل الدكاترة اللي بيمروا عليكم , شرحة جدًا رائع وشخص متمكن من مادته , الدكتور اسامة خوجة رائع. 
• باثوما في المادة هذي هو المنقذ بالنسبة لي , اهم اهم اهم كتاب يفهمك كل شيء فيها ويسهل عليك المادة بشكل م تتوقعه لذلك نصيحة باثوما لا تفوتنه 
• Essential Hematology كتاب حلو 
• تيمنا 436 كان شغلهم جبار بشكل لا يوصف 
• اسئلة الأختبار كانت سهله مره والعملي أسهل بعد , بس مهم تفهموا المادة هذي ولا يصير اكبر همكم هو الأختبار.

باقي المواد 

• الفارماكولوجي سهلة وم كان فيها تعقيد , مصدر مذاكرتي كان التيم 
• المديسن اذكر الدكتور غاب عن محاضرة يفترض انها تكون في الميد بس يوم غاب خلوها بالفاينل , والاسئلة تجي من كلامه بالمحاضره 
• الانتومي مو معقد ابدا ومحاضرته قليله واغلب المحاضرات تكون مدموجة مع الهيستولوجي يعني نص ساعه اناتومي نص ساعه هيستولوجي , اذكر فيه محاضره الدكتور لخبط ودرسنا السلايدات حقت الاسنان ووقت المحاضره ما كفى وصارت حوسه لين بعدين اعتمدنا على سلايدات البنات 
• البايو فيه سايكلز ويحتاج منكم حفظ لذلك اكبتوا ولخصوا ولا تنسون ليبنكوت لانه رائع اذا عندكم وقت